நெருடல்

வேகமாய் நடந்தபோது மறதியால் தொடங்கியது
இன்னும் சுற்றுகிறது காலை
எனக்குள் மாற்றம் ஒன்றை கண்டுவிட்டதில்
விருப்பம்கொள்ளாமல் எரிச்சலடையும் அது
நீட்டுகிறது பொணங்கொத்தி மூக்கை
பார்த்தபோது கும்புடுபோட மறந்துவிட்ட கைகள்
மறுத்து இணைகிறது எதையும் எதிர்க்கும் தெம்பில்

நாங்க அப்படியாக்கும் இப்படியாக்கும்
பழைய புராணத்தில் காலத்தை தள்ளிடும்
பரம்பரை பவுசு விட்டத்தில் குந்தி காலாட்டும்
சோத்துக்கே இல்லாமல் சிங்கியடிக்கும்போது
தலைக்கு ஏறும் சாதிப்பெருமை

மண்டையோட்டில் இழுத்தடிக்கப்பட்ட ஆணி
புடுங்க முடியாமல் கிடக்கிறது
பதுவுசாய் பார்த்துக்கொள்ளட்டும்
அது அவன் பாட்டன் பூட்டனின் சொத்து