கருக்கலின் நீளத்தில் நிகழ்ந்து முடிந்துவிடும் அவை

தொடமுடியா வானம் பறிகொடுத்த நட்சத்திரங்களை
பிடுங்கும் முன் உன் கண்களை மூடிய என் கைவிரல்கள்
உள்ளங்கால் முதல் உச்சந்தலை வரை
இரத்தத்தின் ஓட்டத்தை அதிகரிக்கச் செய்யும்
உன் ஆர்ப்பரிக்கும் உதடு
தொட்டதை விடாதபடி
என் இடுப்பை இறுக்கி அணைக்கும் உன் கைகள்
ஆறடி பள்ளத்துக்குள்ளும் ஆடை களைந்த உன்னை
நிலவு பார்த்திடாதபடி போர்த்திய என் உடல்
உன் முடிகளை கோதியபடியும் இறுக்கி பிடித்தபடியும்
தடுமாறாமல் தடம்மாறாமல்
உன் உதட்டை அழுத்தி முத்தமிடும் என் உதடு
துடிப்பின் உச்சத்தில் பின்னும் நம் கால்கள்
எந்த தடையுமற்று என்
இரத்தத்துளிகளை சுகமாய் பெற்று
நீ விடும் பெரும் மூச்சு
தடைகளற்ற புணர்ச்சியில் தடையிடும் சாதி
மரணமுறும் நாட்கள் நெடுந்தொலைவிலில்லை
அப்பொழுது பசுமையின் வார்ப்பில்
நாம் புனிதப்பட்டுக்கொள்வதற்கு ஏதும் இல்லை