மீட்கப்படும் என் பூர்வ வரலாறு

பெரும்புதருக்குள் சிக்கிக்கொண்ட
உன்னை மீட்பதெப்படி
முள்ளில் சிக்கிக்கொள்ளாதபடி
நகரும் என் கைகள்
இறைச்சியை புறந்தள்ளி அதன் ரத்தத்தில் உருவான
நெய் வாசணையோடு வெப்பக் காற்றின் கரங்கள்
முதுகில் தட்டி முள்ளுக்குள் என்னையும் தள்ளி
இன்னொரு கொலை முயற்சி
காயம்பட்ட வலியோடு அவனோடு கைகோர்க்கிறேன்
உறைந்து காய்ந்த அவன் ரத்தம் உறைகின்ற என் ரத்தம்
சந்திக்கும் நொடி மூச்சுக்குழல் நின்று தொடங்கும்
அந்த அடர்ந்த முட்புதருக்குள்
எனக்கும் முன்பாக தள்ளிவிடப்பட்டவன் அவன்
அவனை மீட்பதில் எனக்கும் என்னை மீட்பதில்
அவனுக்கும் ஒரு பரஸ்பர உடன்பாடு
பழி வாங்கும் குணமற்று
கொடியவனின் எலும்பை முறிக்கும் தத்துவத்தை மட்டும்
அவன் மூளையின் சேகரிப்பில்
அகராதிகளில் நிரம்பியிருக்கும் வார்த்தைகளாய்
அடுக்குத்தேன் போல சொல்ல முடியா சுவையுடன்
ஈரம் படர்ந்த காற்றில் பரவுகிறது