பழமையான பல்கலைக்கழகத்தில் மனித நேயமிக்க அவருக்குப் பெயர் வாத்தி

எப்படியாவது இந்த ஆண்டும் நாலைந்து
அடிமைகளை உருவாக்கிவிடலாம்
ஆய்வேட்டை அப்புறம் எழுதிக்கொள்ளலாம்
அடிமையாய் இருக்க கற்றுக்கொள்ளட்டும் அவன்
ஆண்டை மனோபாவத்துடன் இருந்துவிடலாம்
கேட்பதற்கு எவனும் இல்லை
எவன் கேட்டுவிடபோகிறான்
வாயைக்கூட திறக்கமாட்டான் துணைவேந்தன்
தூரத்து சாதிச்சொந்தம்

சுடுமூஞ்சியாய் சிடுத்தால் போதும்
பையன் பக்கத்தில் வருவதற்கே பயப்படுவான்
அந்த மெதப்புல ஓட்டிவிடலாம் எல்லா நாட்களையும்

எதிரும் புதிருமாய் எவனாவது பேசட்டுமே
ஆய்வேட்டில் கையெழுத்து போடாமலே கடத்திவிடலாம் காலத்தை
கொம்பு முளைத்துவிட்ட கைடுகளுக்கு
முட்டுவதற்கு சுவரில்லாமல் முட்டும்
இந்த பல்கலைக்கழகத்திலும்
மிருகக்காட்சி பூங்காவொன்றை கட்டுங்கள்
நாளைய தலைமுறை நிமிரும் குறியீடுகள் அவை

சேர்க்கையின்போதே
பார்த்து பார்த்து சேர்த்துவிட்டால்போதும்கால்களைச்சுற்றும் நாய் அவன்

எனக்கு கீழவும் இத்தனை ஆய்வுகள்
இவை யாவையும்
நான் சார்ந்திருக்கும் ஒன்றிற்காக உருவாக்கப்பட்டவை
எனக்கு எதிராக ஒன்றும் உருவாக்கப்படாதவை
எனக்கு அவன தெரியும் இவன தெரியும்
என்னை மீறி எதுவும் நடந்துவிடாது

கழுதையின் முகமும் கழுகின் மூக்கும்
நிறைந்த மனிதஜென்மத்தால் உருவாக்கப்படும்
அடிமைகள் சமூகத்தின் ஆணிவேர்கள்