மூடிகிடக்கும் கதவுக்குள் காலடிச்சத்தம்

என் கால் நகங்களைப் பார்த்து
உமிழ்நீர் குடிப்பதை நிறுத்திவிடு
நான் இன்னும் எதையும் படித்து கிழித்துவிடவில்லை
முதல் தலைமுறையில்
மூன்றாங்கிலாஸ் படிப்பதே உறுத்துகிறது உன்னை

எமக்காகவே நிர்ணயிக்கப்பட்ட பாடங்கள் ஒதுக்கப்பட்ட சேரிகள்
அறிவியலின் வாசலில் நுழைவுப்போராட்டம்
மந்திரம் ஓதிகளும் அதை கேட்டு தலையாட்டும் மண்டைகளும்
கதவின் தாழ்ப்பாளிட்டு உள்ளே பூசை நடத்துகிறார்கள்
கலை இலக்கியப் படிப்போடு உடைப்போம் கதவை
மிஞ்சும் வலியில் சுவர்கள் உடைபடும்

எண்ணிக்கையற்ற வண்ணங்களில்லாத வண்ணத்துப்பூச்சி
சுற்றித்திரியும் வனாந்தரத்தில்
அம்புகளுடன் அலைமோதும் கால்கள்
வேகத்துடன் பிரவேசிக்கிறது
கால்களுக்கிடையே மிதிபடாமல் பறக்க பழகிக்கொண்டது
ஒருகணம் நெஞ்சில் ஊற்றெடுக்கும் தெனாவட்டு கம்பீரம்