தொடரும் குளிரில் வெப்பம் மூட்ட முனையும் காய்ந்த சருகுகள்

நீர் சலசலத்து நுரையை கரை ஒதுக்கும் ஆற்றங்கரையில்
முந்தைய ராத்திரியில் முளைத்த கூடாரத்தை சுருட்டிக்கொண்டு
படைதிரட்டி அணிவகுத்து முன்பாகச் செல்லும்
குதிரைமீது போகும் எம் மன்னன் நந்தன்
தெற்கு வாயிலை முற்றுகையிட
மன்னனுக்குப் பின்னால் செல்லும் காலாற்படையில்
அரை வயித்துக்கஞ்சியோடு ஓடும் என் அண்ணன்
ஈட்டியின் முட்டிக்கும் கீழே அளவு கண்டு
என்னை ஒதுக்கும் உங்கள் படைகளுக்கு
வெளியே தள்ளப்படும் நான்
நந்த மன்னனுக்கு மனுவோலை
எனக்கு ஏதுவாய் என் கைக்கு அடக்கமாய்
கூர்வாய்ந்த போர்க்கத்தி பழகப்பட்டே கிடக்கிறது
காலாற்படையின் கடைசி வரிசையில் சேர்த்துவிடு
கத்திபிடிக்க துடிக்கும் என் தம்பிக்கு
போரின் அனுபவங்களை நீ
ராத்திரி தங்கிய மண்மேட்டிலேயே
சொல்லித்தீரும் முடிவில்
அடுத்த படையுடன் அவனும் வருவான்