சாம்பலின் மணத்தில் வீசும் ரத்தத்தின் நினைவுகள்

தெருமுனையில் கிடந்த கல்லொன்றை
எடுத்து வீசியதில்
இந்த பக்கம் திரும்பவே இல்லை அது
எப்பொழுதாவது பார்த்தால்
பழைய வங்குறுப்பில் குரைக்கும்
ஓடி வந்த வேகத்தில் புட்டத்தை கடித்ததை
வீரமுடன் பேசிக்கொள்கிறது சுற்றத்தின் நடுவில்

கண்ணயரும்போது தீப்பிடித்துவிடுகிறது குடிசை
ஜாட்டுகள் வாலில் எரிகிறது தீப்பந்தம்
ஹரியானாவின் காற்றில் எரிகிற வெப்பம்
நாசியில் நெடியேறும் கருகிச்செத்த பிணங்களின் கோபம்

வஞ்சம் தீர்த்துவிடாமல் அமைதி கொள்ளாத மனம்
கர்ஜித்து எரிகிறது
ஒட்ட நறுக்கப்படும்பொழுது காற்றின் வெப்பம்
குளிர்ந்து வீசும் கோடைக்கால மழைச்சாரல்

துரத்தியபோது
தெருவோரச்சாக்கடையில் விழுந்து புரண்டோடிய அது
வாயில் ரத்தத்துடன் ஓடியது நினைவிருக்கிறது
மரணபயத்துடன் ஓடியதில் எப்படியானதோ
கால் நொண்டி நடக்கிறது